名符其實嘅幸運星!

September 18, 2018

名符其實嘅幸運星!

真人真事]幸運星真係好幸運呀!

大家有無睇過前日颱風時一啲廣傳嘅「災難片」:成座大廈啲玻璃吹爆晒,然後入面嘅文件傢俬吹晒出街,好多都係喺紅磡。

尋日朝早有客人電郵比我,話之前訂咗一套刻咗名嘅玫瑰金幸運星頸鍊及耳環,係要送比人做禮物的。佢想改收件地址,原因係佢嘅收件地址係紅磡!仲要係喺損毀嚴重嘅重災區

客人形容佢嘅 office 比颱風吹到爛晒咁滯:成幅牆塌咗,天花板冧咗、玻璃窗爆咗然後啲海水衝入嚟浸濕晒啲傢俬,就連書枱都吹走埋! 所以佢驚如果寄到去,佢都會收唔到。

但係我同佢講改唔到地址,因為喺打風前幾日已經寄出咗,仲要資料顯示份件已經被簽收(相信係同事幫佢簽收咗),即係套首飾喺打風前已經放咗喺佢公司⋯⋯

我覆完個電郵之後都好擔心呀!都唔知會唔會係被吹落街嘅其中一件!

但無幾耐,呢位客人回覆,話佢搵到套首飾啦!佢仲話份郵件係安然無恙咁(Clean and safe)喺佢張枱上面!

我同佢講,呢套首飾你不如自己keep! 喺咁嘅環境都可以用嘆茶咁嘅姿態訓喺度等你返嚟,仲唔係保平安!

#名符其實




Leave a comment

Comments will be approved before showing up.