人不可以貌相

April 14, 2021

人真的不可以貌相 - Don’t judge the book by its cover

我嘅工作室有一位好特別嘅鄰居：一個年過七十嘅伯伯👴🏻，目測無五尺高。細細粒又細細聲。

佢嘅單位比較細，雜物超多，有時仲會擺咗喺𨋢口。由佢嘅雜物，估佢係做裝修電工維修之類。不過同佢唔熟，只係點吓頭打招呼。但呢位伯伯，真人不露相，同大家先分享吓佢幾件事：

🔅🔅🔅【門唔係用嚟爆的 💣💣】🔅🔅🔅

有一日，錄緊音時聽到出面嘈住晒，出去一睇，勁嘢！阿伯伯喺門同天花之間個位開窿！我以為佢裝冷氣，原來佢道門有雜物頂住咗開唔到，就算有鎖匙都無用。

點算呢？佢就擔堂木梯，攞住個木鋸，爬上去鋸咗個「冷氣位」出嚟。咁好勁咩？勁，但未係最勁！

最勁係，眨眼間唔見咗佢，因為佢由個窿爬咗入去開門了！🧗🏻‍♂️

嘩！！！！！個窿離地八尺咁高，好功夫呀阿伯！🥋🥋🥋

第二日，個窿無咗，只剩返四條痕，因為佢補返了，好似乜都無發生過咁。

比著我，只有爆門 🤾🏻‍♀️🤾🏻‍♀️ 呢個方法，就算好似阿伯咁自製冷氣窿咁爬入去，都一定卡實半天吊⋯⋯點落地呀？

🔅🔅🔅🔅【開壇】🔅🔅🔅🔅

同佢熟嘅轉捩點，係有次佢喺𨋢口百花齊放咁攤晒啲零件出嚟整嘢，佢坐喺中間，真係好似孔雀開屏，我忍唔住同佢講：「嘩阿叔開壇喎！」

伯伯聽到後，咯咯笑到對眼咪起一條線：「哈哈，呵呵呵，開壇！係呀開壇呀！」

跟住就熟咗了。

🔅🔅🔅🔅【送水】🔅🔅🔅🔅

有次伯伯見到我攞個電水煲準備斟水，佢即刻叫我唔好飲大廈嘅水，話佢見過條管入面嘅污糟嘢積到好厚🤮🤢。我即刻唔敢煲了。

第二日返到去，伯伯送咗支水比我，話自己一買就買好多，比支我等我唔好再飲大廈嘅水。

我即刻覺得人間有情，忍住嘅眼淚應該有嗰支水咁多💧💧💧。

🎉 🎉 🎉【伯伯嘅真正身份】🎉 🎉 🎉

有日阿伯喺門口正在披緊件好燙貼嘅恤衫，好少見！我問佢咪去街，佢話同老婆食下午茶，我忍唔住又撩吓伯伯：「咁開心去拍拖啊！」佢又笑到見牙唔見眼：「哈哈哈係呀，拍拖啊！💞」

我一直以為阿伯喺間房入面住，仲覺得佢好可憐，咁大年紀仲要日日拉住咁多嘢去開工，張床又可能好細，要同啲雜物一齊訓 ⋯⋯

「阿叔我仲以為你喺度住添！」

「啊，呢度我租嚟放雜物之嘛！我同老婆鬥氣，做乜佢都投訴（下刪一百字），我咪租個地方搬啲嘢出嚟囉！）

（重點嚟嘞⋯⋯）

「我有三個物業🏠🏠🏠，賣咗兩個，而家同老婆一齊住喺嗰度⋯⋯ 」
「我有三個物業🏠🏠🏠，賣咗兩個，而家同老婆一齊住喺嗰度⋯⋯ 」
「我有三個物業🏠🏠🏠，賣咗兩個，而家同老婆一齊住喺嗰度⋯⋯ 」
「我有三個物業🏠🏠🏠，賣咗兩個，而家同老婆一齊住喺嗰度⋯⋯ 」

😧 🤯 😧 🤯 😧 🤯 😧 🤯

嘩話？你講咩話？？？？

我聽到呢度，個腦一片空白，我記得自己好似講咗句：「阿叔你咁有錢仲日日咁辛苦做嘢？」

「無呀，得閒咪執吓紙皮賺少少去飲個下午茶囉⋯⋯ 」

😧 🤯 😧 🤯 😧 🤯 😧 🤯

然後我斷片，糊裹糊塗唔記得自己咩反應了。

由伯伯個門口去到我門口，唔洗十步。喺呢十步裡，我深切地領悟到一個宇宙真締：

書不可以睇封面，
人不可以貌相！

伯伯嘅故事，inspire 我去做一個 Life Story 嘅吊咀。唔係名人故事先至好睇，隔離阿叔嘅故事分分鐘勁到令人斷片。

我好鍾意寫人嘅故事，太精彩了！尤其係呢啲人不可以貌相嘅情節，簡直係一盆新鮮曲奇🍪🍪🍪！可口回味！
Share: