EN
繁
等幾耐都幫你等
當年我仲未有小朋友。嗰朝早落去大排檔食早餐，好多人，所以要搭枱。摺枱對面已經坐咗個中年女人。無幾耐佢打咗個電話，我估佢係等緊老公落嚟先至叫早餐。
個女人無笑容，撓埋雙手撓埋對腳，弓起個身打側咁坐 – 經典唔耐煩預備鬧人嘅body language 😤 .
我個早餐食咗一半，佢老公都仲未落嚟，我都忍唔住諗：「呀人哋老公，想點呀你，行快步啦唔該 🚶🏻♂️⋯⋯」
終於到咗！不過唔係老公，而係阿仔，同埋阿仔嘅女朋友。
應該叫仔仔至啱，因為都好「奶嫩」🥛，有種大學都唔知畢業未嘅奶味。個女朋友都一樣。兩個一落到嚟，仔仔同媽媽打招呼後，就只係招呼女朋友了。
媽媽其實等咗好耐⋯⋯阿衰仔要阿媽幫你攞位，落到嚟你就淨係得女朋友🥊 🥊 🥊⋯⋯
你以為個阿媽一定黑面啦！係，因為都已經黑咗一段時間。
咁嘅情況，係人都黑啦！咁又有乜咁特別要記住呢單嘢十幾年啫？
我有一個天賦，唔知係唔係細個食得太多高敏配方，對於人嘅眼神眉梢咀角呢啲位置，我有超強嘅閱讀能力⚡️
個媽媽雖然係黑面🌚，不過佢見到仔仔嚟到嘅嗰一刻，眼神閃過一刻嘅深度溫柔。雖然都係咀藐藐咁嘅樣，但個黑面樣好似即刻用咗soft lens 咁，樣無變，但暖咗🌞。
佢保持住側身撓手撓腳嘅坐姿，好似話比個仔知「我嬲緊呀！😤」，但個仔叫嘢食時，佢又忍唔住擰返個頭過嚟 （但個身仍然係側的，條頸筋好彈性）睇吓阿仔叫咩食，都係驚佢食唔飽嗰啲啦！
個男仔問完個女朋友食乜，終於記得呀媽嘞! 佢問阿媽想食乜嘢，阿媽仍然側身同佢講：「唔食，你哋食得嘞。」但我睇到嗰下媽媽嘅眼神真係好溫柔，咀藐藐嘅咀角微微上揚⋯⋯
件事真係好耐了，嗰陣時我都仲未有小朋友。而家做咗媽咪，對嗰個媽媽嘅感受更深。媽媽可能唔善於表達感情，擰轉身唔理你，但一聽到你把聲又忍唔住望吓你有無事呀、食得飽唔飽、大熱天時都怕你凍親 、明明話係留一碗湯比你，點知唔係飯碗而係過橋米線咁大嘅湯碗🤯⋯⋯
無論你幾大，你嘅事佢永遠都上心🤱🏻。
母親節要好好氹媽媽，真係比多小小心機氹佢呀！
（尤其有女朋友嗰啲）
#母親節 #氹媽咪 #心頸鍊 #小故事
Leave a comment
Comments will be approved before showing up.
Also in Green Rivor's Blog
人不可以貌相
由伯伯個門口去到我門口，唔洗十步。喺呢十步裡，我深切地領悟到一個宇宙真締：
書不可以睇封面，
人不可以貌相！
伯伯嘅故事，inspire 我去做一個 Life Story 嘅吊咀。唔係名人故事先至好睇，隔離阿叔嘅故事分分鐘勁到令人斷片。
我好鍾意寫人嘅故事，太精彩了！尤其係呢啲人不可以貌相嘅情節，簡直係一盆新鮮曲奇🍪🍪🍪！可口回味！
#人不可以貌相
呢個世界總會有人想起你
原來 「呢個世界總會有人想起你 」，呢句話係真的。
又，我呢排有啲懷疑自己，有啲想法係咪太天真。簡小姐嘅再次出現，似係話比我知，有人係默默支持緊你，佢哋未必會出聲，但佢哋真係喺度。而世界就係要加多幾個茶匙嘅天真，一個天真嘅行為，可以帶比人十幾年嘅美好回憶。
又，我呢排有啲懷疑自己，有啲想法係咪太天真。簡小姐嘅再次出現，似係話比我知，有人係默默支持緊你，佢哋未必會出聲，但佢哋真係喺度。而世界就係要加多幾個茶匙嘅天真，一個天真嘅行為，可以帶比人十幾年嘅美好回憶。
